werdenn. Deshalb sie einen clůgenn sÿn erdacht. Wiewol er wider den
sůn was. Wann sie gab ÿn in die hendt des hertzogenn vonn Osterreÿch.
Welcher ÿr vmb dieselbigen ÿr morgengabe zwelff tawsent marck antwort.

Nůn vermehelt diser hertzog dem Jůngen Marggraůenn sein tochter
Constancia. vnd gab ÿr zů dieselbigenn zwelfftawsent marck.

Als er aber starb ordent er sain sachenn also. Wo der Marggraff zů
seinem volkůmmen alder keme. vnd sein tochterr Constancia nit
behaldenn wolt. solt man ym die gnanten Schlosser vnd pflegenn nit
eingeben. er gebe dann die mergemelte zwelfftaůsent marck wider.

Dann derselbig Marggraff hett ee er zů menlichem alder kam dreÿ
vormůnden. zům ersten sein můterr. Darnach den hertzog von Osterreÿch
Vnd zům dritten den hailigen Lantgraůen Lůdwig zů Důringen der die
Lant wider aůffbracht vnd befridet, wie hernach wirt folgenn.