Rÿedernn. Also schicket der Bischoff vonn Magdebürg herr Gůmprecht
vnnd hernn trost vonn Alpheslewbenn mit herr Bůrckhart Lappen einem
Ritter. vnnd vil bůrgernn aůs Magdebůrg vnnd Halle ein grosses
heer das Schlos vnnd Stetlenn zůrettenn. Als das der Marggraff
Innenn wart. zcog er ÿn aůs der Belegerůng in der nacht entgegenn.
vnd vor dem Schlos wysenbůrg traff er mit yn. leget sie nider.
brachts Inn die flůcht. erschlug ÿr ser vil vnnd gewan vil gůts. Da
wardenn die gnante von Alpheslewbenn mit dreÿhůndert vnnd zweintzig
raissigenn gefangen Die andern errettenn sich mit der flůcht.

Nach erlangtem Sÿg vor Wÿsenbůrg zcog diser Marggraff wider vor
Tawch. Da er aůch das Schlos in grůndt zůbrach vnd die maůrn am
Stetlenn nÿderlegt. Als man noch vor awgenn sÿht.