Da er aůch gar eÿgentlich achtůng aůff die mess hett. vnnd zům
ersten mit lůst. Aber entlich nach der stillmes als der priester
das hochwirdig Sacrament entpfangen. vnd zů sich genůmmen hett.
gieng er mit zcornigenn gemůt vnd angesicht aůs der kirchenn.
Welchs aůch kaÿser karrll wol mercket.

Da nůn die mess ein endt het. schickt kaÿser Karrl nach konig wÿdekint
ÿn bitendt mit ÿm zů essenn. vnd setzt ÿm an die seiten den Priester
der den selbenn tag mes vor ÿm gehaltenn hatt. vnd als sie nůn assen.
Fraget kaÿser karll Konig Wÿdekint also. Brůder wie gefeldt dir mein
malzeit. Daraůff konig Wÿdekint den Priester mit grÿmmigen
awgenn ansah. Vnnd antwort mit harter stÿm. Dein wirtschafft
gefelt mir in keÿn weg. das dů dissen morder mir an die seÿten gesetzt
hast. Daraůff kaÿser karll antwort. warůmb haistů den ein morderr.