Mann findt in etlichen Cronickenn das benanter Babst leo des namen
der Dritt ain geborner Romer. vnd ain frůmmer. kewscher. gelarter.
vnnd hailiger herr seÿ zům kayser karrl in das Lanndt zů Sachssenn.
kůmmen. Nach Cristi gebůrt Sybenhůndert vnd Im Neůnvnndachtzigsten
Jhar. Vnd das ÿm kaÿser Karrl sein Sůn vnter awgen geschickt zůent=
phaenn. Vnd das er ÿm aůch selbst zů fůs entgegenn gangen seÿ. mit=
sambt ainer mercklichen antzal Folcks. vnd hab ÿn Inn allen eren
angenůmmen vnd gehalten zů Padeborn. Aůch das hochbenanterr
Babst aůff kaÿser Karls bit seÿ Im Landt zů Sachssen aůff vnd ab ge=
zcogen. vnd hab die newe Stete gebenedeÿet. vnd vil kirchen geweihet.
Nemlich Padeborn in ere der hochgelobten Gotsgebererÿn Marie. Minden
in Sant Bonifacÿ ere. hameln vnd die Bergkÿrchen aůff dem Wÿdkint=
berg in Sant Niclaws ere. In welcher mittel ain gar lawtter Brůn ist
vnd ain glocken vom Babst Leo daselbst gelassen. vnd disen Babst hat kaÿser karl
wider eingesetzt. vnd In sein Bebstlichen stůl vnd gewalt gebracht. Vnd entlich
von ÿm die Romisch kaÿserlich Kron angenůmmen.