Von welcher Frawen der Romisch Kaÿser. Otto. hat gehabt
aÿn Sůn. herr Lewtolff. Hertzog zů Sachssen vnd darnach
Hertzog zů Swabenn.

Vnd aÿn tochter Lůtgardt. die er hertzog. Cůnradt. von Francken
vnnd Lotringen hat ehelichen vertrawet Mit welcher genanter
Hertzog. Cůnradt. aůch das Landt zů Francken hat vberkůmmen.

Zcům andern hat dieser Romisch kaÿser nach abgang benanter seinern
ersten Frawen. genůmmen Frawen. Adelhaÿdt. Konig Růdolffs.
vonn Bůrgůndien tochter konig. Cůnradts. von Bůrgůndien
swester. Vnd konig. Lotharien. in Jtalien nachgelassene witwe
aůch eÿn selige Fůrstÿn. Welch haÿrat nach Cristi gebůrt
Neůnhůndert. vnnd Im aÿn vnnd Fůnffzcigsten Ihar in Welschen Landen
zů Paůÿ gescheenn ist.

Vnnd hat mit dieser Frawen gehabt dreÿ Sůn.

Hertzog. Otto. zů Sachssenn. vnd nach ÿm Romischer kaÿser des
namens dem andern. den er bald Im andern Iar mit ÿr erlangt hat.

Hertzog. Hainrich. zu Sachssen. Vnnd Hertzog. Braůn. Oderr
Brůno zů Sachssenn. Welche bede sein Iůng abgestorbenn.

Hat aůch vonn ÿr gehabt Dreÿ tochter Frawen. Adelhaÿdt. Oder als
etlich haben. ... [ergänze: Mechtild] Eptÿssin zů Qůidlingbůrg ein serr
gelarte Fůrstÿn Der aůch Wÿdekÿnůs der Cronicka beschreiber von Corbeÿ
sein Lateinisch Cronicka hat zůgeschriebenn.

Itha Graůen Rudolffs von Altorff in Swaben eelich gemaheln.

Vnnd Frawen. Richlindt. die Graůen Cůno von Reynfelt
ist verhaÿrat wordenn.