seinen ainigen Sůn. Hertzog. Lewtolff. Angesehen sein vilfaltig
Loblich vnnd Fůrstlich tůgent. vnd das er seinem Vatern in lobwirdigen.
siten. vnd allen eren folget. Aůch darůmb das er wol ritterlich vnnd
glůckselig in Jtalien gekriegt hett. Derhalben ÿm
sein Vater kaÿser Otto. aůch so hochgnedig wardt. das er ÿm mit
aÿnhertziger vnnd ainmůtiger verwilligůng aller Fůrsten des Romischen
Raichs bestetigt. Vnd ÿn zů einem mit regenten vnd zů ainem Erben Des
hailigen Romischen Raichs. vnd seiner Lande. in seinem testament machet.

Kaÿser. Otto. zcog aůs lieb seiner eelichen gemaheln der Romischen kayserin
Frawen. Adelhaÿt. in Elsas. Inn welchem Land er aůch seiner Swiger
Bertha die Apteÿ Merensteÿn gab. Vnnd derzeit machet sein Sůn.
Hertzog. Lewtolff. ein verbůntnÿs wider ÿn. mit Hertzog. Cůnradt. von
Francken vnd Lothringen seinem tochterman. vnd vil andern herren mer.