Zů Meintz was des Romischen kaÿsers Sůn Hertzog. Lewtolff.
mit ainem here einkůmen. Vnnd wartet seins Vaters mit ym
zůkriegen Darůmb belegt der kaÿser. Otto. die Stat
Meintz. vnd hůb sich daselbst ein vbergraůsamer krieg. vnd erger
dann alle Innerliche krieg vnd Jammer. Dann die vonn
Meintz zebrachen aůch. vnd verbranten das geschůtz vnd was fůr
růstůng der kaÿser an die maůrn gebracht hett. Vor der Stat
geschahen vil streÿt vnnd schlacht. Vnd důrch die verweilůng
verandert sich der handel manchfeltiglich. Vnnd
die von Meintz forchten sich aůswendig vor dem kaÿser. Vnd
Inwendig vor des kaÿsers Sůn. als einen erbenn des Raichs.