vntereinander mit einem grossen aÿdt veraint glaüben an ainander
zůhalten. Darůmb erwegt sich Hertzog. Hainrich.
des kaÿsers brůder. Vnd redt also wider des kaÿsers Sůn. Lewtolff.
Wie darfst ů dich růmen. dů habst wider mein herren den kaÿser
nichts fůrgenůmmen. vnd gethan. Wann das ganntz here
waÿs. das dů willens bist dich des Romischenn Raichs freůelich
zůvnnterwinden. Bin ich schůldig der that. warůmb fůrest dů dein
Legion vnd here wider mich nit. krieg vnnd streÿt mit mir Vnd
hůb also redent ein klain Daglen von der erdenn aůff vnd saget.
Dess soltů nit vermůgen von mir. vnnd meiner gewalt abzůziehen.
Was hat dich gelůst deinen Vater den Romischen kaÿser mit solcher
gestalt zůerwegenn. Dú thůst wider den Almechtigen Got.
das dů deinem Vater vnnd herren entgegen. wider. vnd vngehorsam
bist. Vermagstů etwas so las dein zcorn wider mich. Vnnd
an mir sein aůsgang nemen. Dann ich forcht mich vor deinem
zcorn gar nichts Daraůff gab hertzog lewtolff kein antwort.
Sůndern horeth seines Vaters des kaÿsers gemůt vnnd willen. Vnd
zcog darnach mit sambt den andern wider gein Meintz in die Stat.
Daselbst wart ged achter Eckbrecht des kaÿsers Swestersůn also verlaÿt
das er ein vngůnst vnd vnwillen aůff den kaÿser warff. Vnnd
wie er mit einem gůten vnůerserten glaůben vnd getrewen Hertzen
gegen dem kaÿser in die Stat zů einem pfandt kůmmen was. also
kam er wieder aůs der Stat Meintz mit verborgener heÿmlichen
vntrew in des kaÿsers here. Weÿl nůn pfandt vnd glait
gegeben was. aůs vnnd ain zůzciehenn. Aůff das des kaÿsers Sůn
mit seinem Vater mocht reden. So hett er des Vaters gnad erworben.
Wo er die aÿdtgenossen hett wollen besagen. Als er aber das nicht
mocht. noch kůndt thůn. Wardt er vonn seinem Vettern hertzog.
Hainrich. vbel gescholdenn. Vnd zcog wieder in die Stat.
Welchs gescheen ist. nach Cristi gebůrt Neůnhůndert vnnd Im
DreÿvndFůnfftzigstenn Iharr.