Als nůn Hertzog. Lewtolff. von Swaben aůs Meintz beÿ nechtlicher
weÿl kůmmen was. vnd in Baÿern gezcogen. das er seinen vetternn
hertzog. Hainrich. abgewůnnen. zcog ÿm sein Vater dieser Romischer
kaÿser in Baÿrn nach. Vnd da er mit namen so vnůersehener
behendickait in Baÿrn kůmmen was. gaben sich die Baÿrn wider
in gnad vnd frid. nach in krieg. Sůndern schlossenn die
Stete zů. Vnd machten dem kaÿserlichenn here grosse můhe vnnd
arbeÿt. Vnd gaben vrsach das ÿr Lanndt. von dem Romischenn
kaÿser. gar verhert wart. Wann als der Romisch
kaÿser. Otto. Im zcůg vonn Meintz Jn Baÿrn Dreÿ Monath zůbracht
hett. vnnd Bayrn gar verheret. Vnd doch entlich nichts kůnt
aůsrichten. zcog er vmb das new Jhar wider in Sachssenn Vnd verlor
vnter anderm seinem Folck. zwen die trefflichste haůbtlewth vnd
gewaltigste menner. mit Namen Immed vnd Marprecht. Welche baÿde
erschossen wůrden. ainer vor Meintz. Vnd der ander aůf der Raÿ s in Baÿrn.