Weÿl nůn Hertzog. Lewtolff. seinem Vater diesem Romischen
kaÿser zů wenig. vnd zů schwach war. schicket er nach den Vngern
die beraÿt in Baÿrn kůmmen warn. Aber der Romisch kaÿser.
Otto. erschrack gar nichts. Vergas aůch nÿmmer nit das er
von vnnd důrch gotliche gnad vnd versehůng. zům hailigen
Romischen Raich erwelet was. vnd versammelt ein starcken zcůg
vnd begegent seinen feinden. mit starcker gewalt. Vnnd
verIaget sie aůs dem Landt. Derhalben kamenn die
Vngern also. von Hertzog. Lewtolff. vnd důrchzcogen gantz ober
Germanien. vnd teten grossen schadenn. vnd manschlacht. Fůrtten
aůch Graůen Ernsten der hertzog. Hainrich. zůstendig was.
vber taůsent menschen hinweg. Darnach aůch dergleichen allen
andern. sie erzaigten. Vnd entlich wardt ÿn ser vil golts vnnd
silbers zů Brantschatzůng zů Worms geschenckt. Vnd zcogenn
daraůff wider In ÿr Landt důrch Franckraich.