seinem Sůn Hertzog. Lewtolff. nach. Vnnd leget sich fůr die Stat
horstal. Vnnd geschah ein solche harte schwere schlacht das der gleichenn
kain mensch ÿe gesehen. ader sůst erfarnn hett. Vnd wart vil Folcks
baidersaits vmbgebracht. Wůrden aůch vil verwůndt. Aber entlich
wart die schlacht von der nacht entschaiden Vnd kaÿser.
Otto. gewan darnach dieselb Stat Horstall.

Auff den nechstfolgenden tag nach erstberůrter schlacht vor horstal.
zcog der Romisch kaÿser Otto. mit seinem here. wiewol verwůndet
vnd ser beschedigt hin weg. Vnd lies sich bedůncken. es wer den nit
gůt vnnd frůchtbar lenger stilzůligenn die ferner můsten gedencken. Darůmb
zcog er Inwendig dreÿen tagenn fůr Regensbůrg. Legt sich mit seinem
here zů feldt. Vnd belegt dieselb Stat mit allem vleis. Vnnd
darÿnne aůch sein Sůn. Hertzog. Lewtolff.