Da sich nůn die Belegůng in verweÿlůng gab. beschlossenn die vonn
Regensbůrg mit sambt den ÿren. mit dem Romisch kaÿser zůstreiten
vnd gegen ym zů der were zůstellenn. Wann sie mainten
es wer vil boser vnd schentlicher von hůnger sterbenn in der Stadt
Dann mit Ritterlichem steiten [lies: streiten] Im feldt tot bleÿben. Darůmb
beschlossenn die Regensbůrger ain solchen Radt wider den kaÿser.
Ir reissiger zeůg solt zů dem thor gegen dem Nidergang der sůnnen
gelegen aůszciehen. Jm scheÿn also wolten sie in das kaÿserlich here
fallen. Auch solte ÿr FůsFolck in schiffen aůff der Tůna nachfolgen.
vnd dieweÿl baider here raisige zeůg mit eynander strÿten in
des kaysers here vnd wagenbůrg einfallen. Demnach versammelten
sich die von Regensbůrg aůf ainer glocken zaichen solch fůrnemen zůenden