Darnach zcog Hertzog. Lewtolff. wieder in die Stat Regensbůrck. aber
in gar boser. vnnd grymmiger maynůng. Vnd nach dem
Marggraf Gero sich hett geleget. vor das thor gegen dem aůffgang
der sunnen gelegen. wolt sich hertzog. Lewtolff. an Graůen Gero
versůchen. Wiewol Graf Gero alleweg obsiget. als offt er strÿt
Darůmb geschah ein hart streÿt vnnd schlacht vonn bayden tailn.
von drey Oren bis zů Neůn hora. doch mit grosserm schaden der
Baÿrnn dann der andern. Wann Graff Arnolff von Stheÿrn der
Iůnger ain vrsacher dieses kriegs fiel vor dem Statgraben mit dem
pferdt. vnd wůrdt aůsgetzogen vnnd beraůbt seines harnisch. Vnd
entlich erschossen. Welches abgang man erst vber zwen tag
důrch ain Frawen erfůr. die hůngers halbenn aůs der Stat zcog.