Da nůn kaÿser. Otto. die hailige Osternn bey seinem brůder Hertzog.
Hainrich. hett gehalten. zcog er zům andern mal. mit einem Here
aůs. vnd leget sich vor Regensbúrg. Vnd benotigt dieselb Stat aůffs
hochst so er vermocht. Derhalben da die von Regensbůrgk
von nÿmants wider hilff nach rettůng hetten. vnnd darzů grossen
gebrůch an lifferůng vnd essen lyden. beschlossen sie. sich an Romischen
kaÿser zůwerffen. Vnd zcogen mit solcher mainůng aůs der Stat in
des kaisers here. vnd ergaben sich dem kaÿser. Demnach der
kaiser die fůrnemste der Stat Regensbůrg in das elent verweiset.
vnd des gemainen armen Folcks gar gnediglich verschonet. Vnd also
den Sig wider Regensbůrg glucklich behielt. Vnd gab seinem
brůder Hertzog. hainrich. sein Hertzogthůmb zů Baÿrn zůsambt.