bevlissen Vnnd vnter andern seÿnen gar vil kaÿserlichen tůgenden
hat er aůch hernachfolgende gehabt. Das er ist alleweg gotfortig
gůtig. Barmhertzig. vnnd senfftmůtig gewest. Aůch Inn allen
seinen wercken. hochliplich vnnd bestendig. Vnd das er seÿnen
freůnden vnd getrawen dinern nichts Erbars vnd můglichs ÿe versagt
hat. Er verzcÿh aůch so gnediglich vnd leichtlich was wider
ÿn gescheen was. das er vil die als verachter vnd belaÿdiger seiner
kaÿserlichen Maiestat beclagt warn. wider in gnaden nam. Vnd theth
ÿ n aúch nit weniger gnad. vnd gůt. dann wenn sÿe nÿe wider ÿn gethan
hetten. In welcher tůgent es mag wol dafůr geachtet werdenn.
Das er seÿnen loblichen vorfordern der Romischen kaÿsern vnd sůnderlich
kaÿser. Juliůs. Vnd kaÿser honoriůs. Teodosiůs. Vnnd
Arcadiůs. Welche alle so senfftmůtige Fůrsten gewesen
seÿn. Das kaÿser. Jůliůs. mer dann ein der die ym nach seÿnem
Leÿb vnd leben getracht haben. aůff ÿr demůtig biten. solch vbeltat.
vnd bos maÿnůng gnediglich vergeben hat. Sůndern aůch In alle
vorige gnad zůstůndt gesetzt. vnnd etlich des tags der versůnůng
an sein tisch genůmmen. Wie gutig aber die andern
Dreÿ benante Romische Kaÿser gewesen seÿn. ist aůs ÿrer gesetz
eÿnem. Wiewol eÿnem ser cleÿnen abzůnemen. Welchs steet In
kaÿserlichen rechten In Codice Im Titell. Wann eÿner dem kaÿser
vbelredt. Vnd hat diese maÿnůng. So ÿmants důrch seÿn
vnůernůfft. vnscham. vnd vnůerstandt. vnser Name n sich
wůrd vermessen mit boshafftiger vbelred zůbelaydigen. vnnd In
drůnckenhaÿt vnnser regiment versprechen. den wellen wir nit der
straff vnterworffen haben. Sal aůch nichts harts ader scharffs.
darůmb erleÿden. Dann So es aůs leichtfertickait gescheen ist.
So ist es zůúerachten. Ist es aůs torhaÿt kůmmen. So ist
es zůerbarmen. Ist es aber aůs vnrecht vnd boshaÿt gescheenn.
So sal es vergeben werden. Darůmb wellen wir das In solchen
fellenn. an vnnser wissen vnd befelh nichts gescheen. Sůndern das
der gleichen sachenn an vns gelangen. Damit wir můgenn aůs
eÿgenschafft der menschen yr red achtenn. Vnnd daraůff erkennen ab
es zůvbergehenn. Oder aber weiter zůerfarn seÿ.