hailigsacrament von dem hailigen Bischoff Sant Vlrich zů Aůgspůrg
entpfangen hett. richtet er sich aůff von der erden. verwappent
sich. Vnd nam den schilt. vnd das hailig sper. Darnach
ordent er hawffen mit ÿren spitzen. Vnd sein acht legion also.
Die Ersten. andern. vnd dritten legion fůrt hertzog. Hainrichs.
von Baÿrn Ritterschafft. Wann er personlich nit Im here was.
von schwerer kranckhait wegen damit er beladen. vnd von welcher
er aůch starb. Den vierdten haůffen fůrt hertzog. Cůnradt.
von Francken mit seiner Ritterschafft. Die Fůnfft legion
was die groste von aller Ritterschafft aůserlesenn. DarInne
was aůch der kaÿser. Otto. daůon es aůch die konigliche Legion
gnant. Hett aůch taůsent aůsserlesen Ritter vmb ÿn. vnd
beÿ Im das haůbtpanir des hailigen Creůtzes. Vnnd Sandt
Michels. Den Sechsten vnnd Sibenden haůffen fůrtenn
die Swabenn. Vnnd hetten zů hawbtleůthen hertzog. Búrckart.
Hertzog. hainrichs. tochterman. Vnd Graůen Dipoldt
zú Růberg vnd Tillingen. Welcher ein brůder was des hailigen
Bischoffs Sannt. Vlrichs. Den achten haůffen hetten die
Behemen Taůsent aůserlesener wepener die da solten das gerete.
vnd den herzeůg vnd was behindern mocht. als die sicherstenn.
bewarn.