Als nůn der Romisch kaÿser das Folck in acht Legion wie vermelt.
getailt hett. furt er das důrch půsch vnnd enge wege. aůff das
die feint den seinen mit schiessen nit schadenn tetten.
Es gieng aber vil anders dann ÿr hoffnůng. anschlag. vnd
mainůng was. Wann die Vngernn schwemten mit grosser eÿlůng in
mercklicher anzcal vber den Lech. Vnd schossen zů dem
letzten haůffen der kayserischen ein. Vnd fieln zů ym ein mit
grosser vngestÿmmickait vnd mit graůsamen geschreÿ. Vnd erstochen
der kaiserischen etliche. etliche fingen sie. Vnnd
gewůnnen aůch also den gantzen letzten haůffen. vnd yr geredt
Die ander wepener desselbigen haůffens brachten sie in dy flůcht
Darzů striten sie wider den Sechstenn. vnd Sibenden haůffen. ser
hertiglich. vnd also. das Graf Dipold. von Růberg vnd Tillingen
vnd vil andere mer niderlagen. vnd derhalben aůch die andern flihen můsten.