Am andern vnnd dritten tag wůrden die verblieben Vngern so ser vnnd
so grosser anzal erschlagen von dem Folck der vmbligenden Stete das
yr gar wenig. ader gar schier kainer beÿ leben blib. vnd daůon kam. Aber
wie dem. so kam der Romisch kayser. Otto. aůs dieser schlacht. nit
an schadenn vnd verlůst der seinen. Wann Hertzog.
Cůnradt. von Francken sein tochterman. als er Ritterlich strÿt vnd
von wegenn der grossen Sůnnen hitz in merckliche mattickait fiel.
vnd derhalb den helm offent lůfft zůfahenn. wůrd er mit einem pfeil
in hals geschossen. Von welcher wůnden er starb. Welches Corper aůff
beůelh der kaiserlichen Maiestat gein Worms gefůrt wardt. vnd mit
grossem weynen vnd clagen aller menschen auffs wirdigst zů der erdenn
nach Cristlicher gewonhait bestatet. Als nůn der Romisch kaÿser
solchen hochloblichen Sÿg wider die Vngern. aůff dem Lechfeldt
behaltenn hett. wart er von dem gantzen here. Ein Vaterr.