Da nůn der Romisch kaÿser. Otto. widerheÿm kůmmenn was. vnd sich
bey seiner hochwirdigen můter zů Qůidlingenbůrg hochlich
erckwickt vnd belůstiget. wolt er sein gelůbd erfůllenn. Vnnd zcog
gein Mersbůrg. Vnnd fing an sein New haws von grůndt auff
erbawet vnnd aůffgericht zů ainer kirchen zůmachenn. Vnnd
Hies in die Ere des hailigenn merterers Sancti Laůrencÿ weÿhen
Vnnd begabet gedachte kirchen mit grosser vnnd vilfaltiger freÿhait
vnd machet also ein Bistůmb zů Mersbůrg.