Da sie nůn kain hoffnůng hettenn dem hertzogenn fruchtbarn
widerstant zůthůn. namen sie zwen Wendische Fursten mit Namenn
Nanco vnd Stoynew gebrůdere. die den Sachssen vil zeit gram warn
gewesen. in yrn Bůndt Darůmb erhůb sich der Hertzog.
wider sie mit eynem here. Vnd fandt sie in ainer Wendischenn
Stat. Snethleistranno genant. Vnd felet nit vil das sie wern gefangen.
vnd die Stat gewůnnen worden Welchs aines ainigen mans
geschreÿ bewart. daůon sie gewarnet. sich zům streÿt růstetenn.
Also erschlůg der hertzog Vierzcig Weppener vor der Stat. vnd bekam
den rawb. vnnd die Wapenn. der erschlagenen. Vnd zcog sighafftiglich
mit sambt Graůen Heinrich. vnd Graůen Sigifrid seinenn
gebrůdern. gar trefflichenn Lewthenn. mit rath vnd that. wider weg.
Welchs dann ist gescheenn am anfang der hailigen Fasten Nach Cristi
vnsers herrn gebůrt Neůnhůndert vnd Im SechsvnndFůnfftzigsten Jarr.