Als kaÿser. Otto. widerůmb aůs dem krieg heÿm kůmmenn was.
in welchem er die Vngarnn erschlagen hett. gedacht er mit allem
vleÿs vnnd ernst der wenden vntrew zůrechenn. Darůmb zcog
er mit eynem here auff sie. Vnd mit gůtem bedechtigen Rath
beschlos er Graůen Wigman. Vnnd Graůen Eckebrecht fůr feindt
des hailigenn Raichs zůhalten. Vnd erteylt sie Inn die Acht. dorůmb
das sie sich zů den Wenden wider den kaÿser hetten verbůnden.
Aber den anndern allen wolt er gnad erzaigenn. So sie wider ůmb
kerten. vnd sich an ÿn gebenn. mit verlassůng des wendischen Bůndts.