Es kam aůch der wenden botschafft. anzcaigendt. wie yr aidtgenossenn
wolten die tribůt erhaltenn. vnd In kain weg begeben. Vnd mit
solchem beschaidt begerten sie ein frid. Sůst an das wern sie willig
mit dem schwert vnd krieg yr freÿhait zůhanthaben. vnd zůůerfechten.
Daraůff der kaÿser antwort. Er wolt ÿn den frid nit absagen vnnd
wegern. Aber er kůnt yn gar nichts geben. sie hettenn sich dann.
erzaigter scheden. schmeůng. vnd Iniůrien vorhin mit billicher Erůng
straff vnnd gnůgsamer entgentzůng entschůldiget. Daraůff zcog der
Romisch kaÿser mit seinem here důrch der Wenden Landt. vnd verheret es
mit Brandt vnd anders. bis er sich mit seinem Folck an dem wasserr Raxa
zů felde leget. An welchem endt er von den feinden wart vmbgeben.
vnd in gros not gebracht. Wann hinter ÿm hett er holtz vnd die feynde.
Vnd vor ym ein fliessent wasser. vnd daran ein sehe. Auch die Wenden
mit einem grossen here. die ÿn hinderten sein zcog zůůerbringenn.
Das bos vnnd widerwertig glůck lies sich aůch an vermeltem vnfal