ein here. vnnd was fůr wapen das dů dich so grossen fůrnemens
vermist. hast dů Oder die deinen sterck vnnd streitbarkait. vnnd
manliche kůnhaÿt So kůmmet zů vns. So eůch solchs nit gelibt
wollen wir eůch mit glawbenn stat gebenn. vnd erlawben zů vns
zůkůmmen. scheinlich zůerfarn. Welchs tail am stercksten
vnd sighafftigstenn seÿ. Ir solt eůch aůch in kain weg verhoffen
das der kayser werd ablassen vnnd vmbkeren. Vnnd das sein Here solt
flůchtig. mit so trefflicher Ritterschafft vnd manschafft werdenn.
Darůmb ist mein Rat vnnd wolmaÿnůng dů wollest dich an kayser ergebenn.
Vnd ÿn lieber ein gnedigen herren. dann ein feindt erfarn vnnd
erlernen. Da Solchs Marggraff Gero aůsgeredt
hett. schrÿ der Wendisch herr. mit grobem wendischenn geperde. vnd
verspot Marggraf Gero mit vil scheltredenn. Vnd nit allain ÿn.
Sundern auch das gantz kaiserisch here. Wann er wůste
das der kayser. mit sambt seinem here. gar mit vil noten vmbgeben
vnd beladen was. Daraůff Graff Gero als ein zcornigerr
Ernster herr Saget. Der morgen kůnfftiger tag sal beweysen wie starck
vnnd můgenhafftig dů vnd dein here seÿt. Wann Sůnderzweiůel morgen
werdet yr sehenn das wir ritterlich werden mit eůch streÿten. Vnd
zcog also wider in das kaiserisch here. Ansagendt. Was vnnd wie er
sich mit der Wenden hertzogen Stoynew vnterredt hett. Vnd gab
daneben diesen Rath. das die kaÿserische aůff nechst folgenden morgen.
solten sie sich weÿsen. vnd also wolten sie mit ÿn streiten erzaigen.
Darůmb soltenn sie ÿn mit seynem Folck lassen wegzciehen. in der
nacht. Wann er wolt ÿn ein sichern freÿen zůg verschaffen.
mit sambt den Růgen ÿrn bůntgnossen. vnd seiner Ritterschaft.
Aůs welcher Ritterlichen geschicht Graff Gero. wiewol aůch
vormals ser hochberůmbt. vil serer berůmbt vnnd gepreÿst wardt.
vnd beůor das er die Wenden Wagir genant am Růcken des Landts
Cůnbricůs Cherronesůs genant mit grossem Sÿg vberwůnden vnd
nidergelegth hett.