Folck ligenndt verlassen Als nůn gedachter hertzog Stoÿnew
gericht was. wie vermelt. vnd annders bescheen. Flogen die zwen
Graůen Wigman. vnd Eckebrecht In Franckraich zů Graůen Hůgo.
von Parÿs als wissenhafftig yrer schůldt. vnnd der vorgreiffůng
an der Kaiserlichenn Maiestat.

Der Romisch kaÿser Otto. schicket beÿ diesenn tagen abermals ein here
mitsambt Marggraůen Gero vnnd Seÿfrid seinem Sůn wider
Graff Wigman. Welcher Graff Wÿgman entlich sich
dem Romischenn kayser ergab. vnd gelobt seiner Maiestat hinfůr
ewiglich getrew vnd holt zůsein. Aůch das er nymmer mer ichts wider yn
Ader das haÿlig Raich wolt fůrnemen. Daraůff wardt er wider ledig gegeben