frembden vnd vnbenanten. Sůndern aůch von den seÿnen vnd die ÿm am
nechsten bewant warn. Als Nemlich von etlichen seÿnen
Landtschafften. vnd seÿnen brůdern. vnd seÿnem Sůn. Hertzog
Lewtolff. Vnd wart nach weissagůng des tewffels mit
grosser zwÿtracht vnter den seÿnen betrůbt. Wie es dann aůch
alles an gebůrenden enden folgenn wirt.

Pfaltzgraff Eberhardt. am Reÿn vnd Hertzog. Tammarr. dises
Romischen kaysers stiffbrůder machten eyn verbůntnÿs wider den
Romischen kayser. vnd zcogen dem Romischen kaÿser mit heer In sein
Landt vnd Als Pfaltzgraff Eberhardt. am Reÿn mit sambt
hertzog Tammar. zů Sachssen diesem Romischen Kaÿser sein brůder
Hertzog. Hainrich. aůff dem Schlos Badelick gefangenn vnd mit
ÿn an Reÿn gefůrt hettenn. zcog diser Romischer kaÿserr
benantem pfaltzgraůen mit heer In seyn Landt verderbt dasselb. vnd
macht sein brůder mit gewalt ledig.