Dieweil sich alle menschen vermůten der Romisch Kaÿser. Otto. wůrd
wider heÿm kůmmen. enthielt sich Graff Wigmann alles můtwillens Da sich aber des
kaÿsers widerzcog aufschob zcog er zům konig. Haroldt. von Dennemarck ein
newen krieg mit seiner hilff wieder den kaÿser fůrzůnemen. Darůmb saget
der konig Graff Wÿgman. wenn er den hertzogen von Sachssen Oder sůst
ainen andernn Fůrsten vmbbrechte. dabey wolt er mercken vnd versteen das
er sich mit ÿm wolt an arglistickait verbinden. Wo aber
nit. So hielt er sein beger vnnd ansÿnnen fůr ain betriglickait.
Inn mitler zeit brach sein Rawbereÿ důrch aines kramers meldůng aůs
Es wůrdenn aůch seiner gesellenn vnd beÿpflichter etliche vom
hertzogen zů Sachssen gefangenn vnd gehenckt. Vnnd
Graff Wÿgman kam aůch selbst schwerlich mit dem lebenn darůonn.