Da ym der Romisch kaÿser nůn hett fůrgenůmmen der Denen vntrew.
vnd vntat zůrechen. zcog er mit ainem grossen here in Denemarck.
Vnd gewan alles Landt von Sleswick. bis aůff das letzte gestat
des Gůrtel meres. das wir die See nennen. Vnnd verheret das
gantz Lanndt gnant Cherronesům Cůnbrorům mit swert vnd feůr. Der
Romisch kaÿser Steckt sein sper in das Mer. Daůon aůch bis aůff
den heůtigen tag die ganntz Gegent wirt gnant der Ottensůndt
vnnd bawet aůch ain Stetlen desselben namens. Darnach
zcog der Romisch kayser wider gen Slesswick vnnd vberwannt
Konig. Baroldt. vonn Denemarck. Vnd bracht ÿn zům
hailigenn Cristenlichen glawbenn.