Dieser Romisch kaÿser. Otto. hat aůch zů sterckůng des hailigen
Cristlichenn glawbens vnnd merůng des gotlichen dinsts gebawet
Jnn dennemarck drey Bistůmb Sleswig Arhůs vnd Riga alle an der Sehe
Jůtlant gnant gelegenn. Welche dreÿ Stete drey Ihar nůtzbar
gestat habenn. Sleswick hat ain arm des Meres die Slia gnant.
Daselbst fert man in Swedenn vnd In Semlandt. Von
welchem arm des mers Slia. Sleswick den Namen hat. Riga
hat aůch ain arm des meres daůon mann pflegt zůfarenn Inn
Friesen. Ade ÿe in Engellandt. Vnd von Arhůs kan man.
faren in das Seelandt. vnd bis in Norwegien Dieser
Romischer kaÿser hat aůch In Wenden zweÿ Bistůmb gestifft. Stargardt
das von den vnsern wirt Wenden Aldinbůrg gnant in der Ere des hailigen
teůffers Sancti Joannis. Vnnd Mechelbůrg Oder Swerin in die
ere des hailigen ApostelFůrsten Sant Peters. Welche
Bistůmb kaÿser. Otto. alle reichlich begabeth vnnd versorgeth.