Darnach nam dieser Romischer kaÿser. Otto. der Gros von Bebstlicher
hailickait die Romische kaÿserliche kron. sampt seiner gemaheln an.
Wie aůch Richardůs vnd Lůsentinůs darůon schreiben Aber
etliche andere. Welchen aůch der Ernwirdig Vater Gracianůs der
das Decret In gaistlichen Rechten zůsammen gebrachthat. Folgtt
schreiben. dieser Romischer kaÿser hab vom Babst Leo des Namen
des achten. die kayserliche kron angenůmmen. Welchem Babst
dieser Romischer kaÿser zům Babstůmb geholffen. vnd ÿn mit gewalt wie
hernach folgen wirt erhalten hat. Weÿl nůn dieser Romischer
kaÿser die Vngarn aůs Welschen vnd Teůtzschen Landen welche sie
bede ser verhert. vberwůnden vnd vertriben hetten. Wardt ÿm Inn der
kaÿserlichen kronůng von Bebstlicher hailickait der loblich Tittel
gegeben. Welchen die Romische kaÿser vnd konÿge bis aůch
dieser Zeit haben. Das sie aůch konige zů Vngarn genent werden.