Im Namen des herren Almechtigenn Gottes Vaters. Sůns. vnnd haÿligenn
gaists. Jch Lůdwig. kaÿser verleÿ dir hailigen
Apostel Fůrstenn Petro. vnd důrch dich deinem Stathalter herrenn
Paschali Babst. vnd seÿnen nachfarn ader nachkůmmen in ewickait
die Stat Rom zůsambt yrem gerichtszcwang vnnd ÿrer Obirkaÿt.
Aůch mit sambt allen Landen. Steten. Porten darůmb. vnd gegenten
an dem meer In Ethrůrien gelegen. Aůch in dem selbenn
Landt die Stat genant Vrbs Vetůs. die Stat Balner Regiům. Die
Stat Viterb. die Stat Soann. die Stat Popůlon. Die Stat Rosel.
die Stat Perůs. Die Stat Matůran. die Stat Sůtrÿ. Die Stat Nepe.
Gegenn dem Landt Campanien. Anagnia. Signia. Ferencin. Alatrÿ.
Patrick. Frůsinon. mit sambt allen Stetten vnd dorffern darůmb.
Aůch die ganntz herrschafft zů Rabenna wie sie seligen gedechtnÿs.
vnser Vater. Karrl. vnnd vnser anherr Oder grossvater. Pipin.
Sant peter In vorzeitenn verlÿhen habenn. Nemlich Raůenna.
Boůÿ. Aemilÿon. Forům Popůli. Forům Liuy. Faůentz. Jmol.
Bolonÿ. Ferrer. Comaclům. Adrien. Ceruy Inn der Marck.
Pisaur. Fan. Senogall. Ancon. Anxim. Núman. Esiům For
Sempron. Fereir. Vrbin die gegent Valnes. Calliům. Lůceol.
Eůgůb. Jn Campanien Sera. Aqůin. Arpin. Thean
Capua. Aůch die Erbgůtter zů vnser obirckaÿt gehorendt.
Die hertzogthůmb Beneůent. Salern. der vndern vnd obern Calabrien
Aůch das Hertzogthůmb zů Neapols. Vnd das Hertzogthůmb zů zů
Spolet. Item Tůder. Otricůlům. Narnien. Vnnd
alle Inseln desselbenn gepiets des vntern meers. Cros [lies: Cros]. Sardin.
vnd Sicilien. Welche alle seliger gedechtnůs vnser Anher
Oder Grosvater. Pipin. Vnd darnach Kaÿser karll. vnser Vater
důrch die Epte Atherÿ vnd Maÿnardt. Freÿer Willkur derhalbenn
geschickt Sant Peter. vnnd seÿnen nachkůmmen schrifftlich
verlÿhen habenn. Welchs wir aůch bestetenn Vnnd
verleÿhen Darůber wellenn wir die gewalt eÿn Babst zůerweln.
beÿ dem Romischen Rat sein. Doch also wenn es an zwitracht
geschiedt. Vnnd das nach der weyhůng botschafft zů vnns. Vnnd
vnsern nachkůmmen den konigen zů FranckRaich vmb lieb vnd
Freůntschafft willen geschickt werdenn. Als beÿ den
zeitenn herren.x … vnsers grossen anhern. vnsers anherren
Oder Grossvaters Pipin. vnd Entlich vnsers Vatern. Karls.
gewonhaÿt gewest ist. Derhalben wir disen vnsern willen
schrifftlich. vnnd mit dem aÿdt besteten. Vnnd
důrch Theodor der hailigen Romischenn kirchen Legaten Oder
botschafft. herrenn Paschal zůgeschickt hab. Vnd mich mit eÿgener
hanndt vnterschrÿben.

Jch Lůdwig.