Aůch habenn sich Dreÿ Sůn desselbenn kaÿser. Lůdwigs. Zcehen
Bischoffe. Acht Epte. vnd Funffzehen Graůen vnnterschriben.

Hernach vber etlich zeit hat dieser Romischer kaÿser. Otto. der Gros
solch gros kaÿserlich begabůng. beÿ der zeit des Babsts Joannes des
Namen der zwelfft bestetigt. mit diesen Lateinischenn worten.

Ego Otto Jmperator. pro anime nostre filÿque. ac parentům
nostrorům salůte. hec omnia sůpradicta tibi Beate Petre
sůccessoribůsque tůis libenter concedo.

Welche sein Lateinisch bestetůng vnnd vnnterschreÿbůng Im
Teůtzschenn also Lawthet.

Ich. Otto. kaÿser verleÿ gernn vnnd williglich dir Sant Peterr
vnnd deinen nachkůmmen zů haÿl meÿner. meÿnes Sůns. vnd meiner
Eldern selen. alles was so oben berůrt ist.

In welcher bestetůng des Romischen kaÿsers. Otto. Sich haben
vnterschribenn zehen Bischoffe. zwen Epte. Fůnff Graůen. Vnnd
acht gewaldige Oder Amptlewth. Vnnd ist gescheenn Nach cristj
gebůrt Neůnhůndert vnnd Im Zweÿvnndsechtzigsten Jhar. In der
Fůnfften Indiction Oder Romerzcall.

Vnnd vnter des Romischen kaÿser. Hainrichs. bestetůng habenn
sich vnnterschriben Vierzehenn Bischoffe. Vier Epte. drey hertzogen
Acht Graůen. vnd Acht gewaldige Erbare mennerr.

Welchs alles dieser lenge. Derhalben hie wirt angetzaigt. Damit
eÿgentlich vnterrichtůng. Vnd wie es aůch in der Bebstlichenn
Libreÿ zů Rom verzaichent ist. zůgebenn. Wie eÿn getrewer
hanthaber der hailigen Romischen. vnd gantzen Cristlichenn
kirchenn. Der Romisch kaÿser. Otto. der Gros gewest ist.