Weÿl der Romisch kaÿser vor Sannt Leobůrg vor konig. Berengar. lag.
mert Babst. Joannes. der zwelfft sein vncristlich lebenn. Vnd
lies sich nit benůgen an eÿgener vntůgent. Sůndern wolt weÿter vnd
merer vbels erregen. Darůmb fordert er gen Rom als etlich
schreibenn. Adalbrecht konig. Berengars. Sůn. yn wider den
Romischen kaÿser zůgebrauchen. Vnangesehenn bescheener zůsage
sich aller enporůng zůenthalden. Darůnder er den Cardineln aůch ser
vngnedig wart. Vnnd yn vil verdris vnd vbels ertzaigt. Derhalben sich
zwen Cardinel. aÿner Aro. vnd der annder Joannes genant solch der
hailigen Romischen kirchen vnd derselben Cardinel obligen schrifftlich
zůerkennen gaben. mit angeheffter antzaigůng des vncristlichen lebens
benants Babsts. Aůch vleissiger bit das sein kaÿserlich Maiestat wolt die
belegerůng Sant Leo Bergs. Vnnd konig Berengars. vnterlassen vnd gen Rom
kůmmen. dieselb Stat vom vncristlichen Regiment vnd leben de s Babsts zůerlosen.