mit dreÿen seynen vedtern. die dieses verbůndtnÿs vrsacher gewesen
warnn. hencken. Damit eÿn forcht zůmachen. desterweniger
enporůng zůerregenn.

In eÿnem streÿt wůrden die Sachssen. vnd zůůor des Romischen Kaysers
Otto. Ritterschafft so blod das etlich dem kaÿser rieten zůweichenn
vnd eylend wider in Sachssen zůzcihen. Welchenn der
Romisch kaÿser vnerschrocken diese antwort gab. Es wer ein
grosse vner. das wir vnnser ere vnd redlickaÿt solten mit lasterr
vnd vnere vermischen. Derhalbenn ist vnser end
kůmmen. So last vnns Ritterlich sterbenn. Damit vnser feÿndt
můgen erfarn. vnd entfinden. das vns vnser crefft vnd streitbarkaÿt
also angeborn vnd eingepflantzt seÿ. das wir fůr besser achtenn.
von wegen der gerechtigkait erlich sterben. dann mit flůcht schentlich
vnd vnerlich lebenn. Mit welchen worten der Romisch kaÿser
sein Folck vonn yrem blodenn gemůt weÿset. vnd sich zům streÿt
williglich zůbegeben. bewegeth.