dem Grossenn. zů welcher zeit aůch Babst Agapitůs lebt. vnnd
Sannt Cůnradt der hailig Bischoff zů Costentz. Vnnd Sant
Vlrich der heilig Bischoff zů Aůgspůrg. Ist Sannt Blasÿ Closter
Im Schwartzwalt vonn dem hailigenn Reginbrecht. von Selibirn
Panerherrenn. gar aůs Edelm stammen Im Landt zů Zcerichgaw
gebornn. angefangen worden. Dann wiewol derselb
Panerherr eÿn gar streitbar Ritter vnnd In der welt war. Doch
dient er Got trewlich. Vnd hett ein so gnedigen herren am Romischen
Kaÿser. Otto. das er vil beÿ ÿm. vnd ÿm ganntz heÿmlich warr.
Als nún die feÿndt. des haÿligenn Raichs aÿn mall Inn das Raich
fielnn. wart er vom Romischenn kayser gefordert. Mit dem er also
Inn streÿt zcog. Als er nůn gar Ritterlich wider die
feindt streyt. Vnnd ÿr vil menlich erlegt. Verlor er entlich eÿn
handt Inn der selbigenn schlacht. Derhalben
er darnach ÿm fůrnam die wel t zůůerlassenn vnnd allein Got.
zúdienen. Darůmb kam er zů diesem Romischenn kaÿser.
Otto. sein kaÿserlich Maiestat aůffs demůtiglichst bittendt ÿn der
weltlichenn Ritterschafft zůentbindenn. Vnnd ÿm zůerlawben
eÿn Ordenn anzůnemen. Also wart der Romisch kaÿser
aůs erbarmůng bewegt. vnd erlawbt ÿm gnediglich. Demnach
zcog der hailig Vater Reginbrecht vom Romischen kaÿser. In Swartzwalt
an das wasser Alb genant. an dem Ort. Da itzt Sannt Blasiůs Closter
leÿt. daselbst Got tag vnnd nacht Inn aller Jnnickait diennte.
Derhalbenn sich in kůrtz vil Cristlicher vnnd Andechtiger menner
dahin sich sammelten. zellen. baweten. Vnd ein hůltzernn Closterr
aůffrichtenn. Darnach zcog der haylig Vater aÿn mal zům
Romischen kaÿser. Vnd eÿgent seÿn New Closter Got vnnd Sant
Blasio den der hailig Vater Reginbrecht sůnderlichenn zů eÿnem
patron vnnd hawbtherrenn erwelt hett.