Im Namen der haÿligenn vnnd vnteilsamen dreÿfaltigkait. Otto.
aůs geschefft gotlicher gůtickait kaÿser. Merer des Raichs. Nach
dem wir hoffenn es sal vnns zů ewiger selickait in Cristo dienen vnd
gedeÿen. wann wir die kirchenn von vnsern vorfordern Got gebawet.
Oder beÿ vnsern zeiten in gotes ere angefangen. hanthaben
vnd vnsewmig vnd bevlissenn sein sie mit ewigem frid zůbestetigen.
Derhalbenn wir allen Cristglawbigenn vnd Gottes vnd vnsern
getrawen gegenwertigen vnd zůkůnfftigen wellen kůndt vnnd
vnůerborgen seyn Wie das wir die zellen Im Swartzwalt von
dem seligenn eynsidel Reginbrecht. newlich gebaweth. Got vnnd
Sant Blasio. mit den vmbligenden orten. vnd yrem zcill. zů aÿner
artzneÿ vnser selen. Vnnd vnterweÿsůng vnser getrewen zů eÿgen
gegeben haben. Welche zcellenn wir also mit recht vnnd
ordenlich besteten. Vnnd freÿ machen aller menschlichenn gewalt
vnd obirckait. Vnd dieselben benanten haÿligenn man der Erstlich
hat a ngefangen daselbst zůwonen. Vnd allen die Got da dienen freÿ
vnnd gerůlichen zubesitzen gelÿhen habenn. Nemlich
also. Das der benanten zellenn gůter vnd gegent sich zciehen vom
vrsprůng vnnd brunnen des Cheinpachs bis zům dorff heibenswanda.
Von dannen bis an das dorff Werenbrechstet. Von Dannen
vnd am berg daselbst bis der Swendenbach in die Alb fleůst. Von
Dannen bis zům Vrsprůng der Steinah Von dannen bis zům berg
Veltberg. zům brůnnen der Alb. Von dannen bis an das endt
dadie Schwartz aůs dem Slůchsee geet. Vnnd an dem selben
wasser hinab. bis an das ortt da die Cheinbach in die Swartz flewst
Vnd also bis zům vrsprůng des Cheinbachs. Darůmb
sal kein Hertzog. Graff. oder ander merer oder weniger person
in benanten gůtern eÿnig recht habenn. den můnichen in berůrter
zellenn wonhafft. sich wider gewalt nach vnrw zúerzaigen vermessen
vnd vntersteen. So aber ÿmandts sich des vnter stůndt der
sol der konÿglichenn gewalt vnterworffe n seÿn. Vnd
aůff das diese sch... schrifft vnd begabůng allezeit bestendig. vnůersert
vnd gantz bleyb. haben wir diesen brieff zůschreiben vnd mit vnserm
Sigil zůůersigeln befoln. Vnd mit vnserm aÿgen hantzaichen befestet.

Des grossenn vnnd. AllerSÿghafftigstenn
Romischen kaÿsers. Otto. des Grossenn
hanntzaichen.

Jch Bischoff hÿldbolt vnd Cantzler. habs an stat Willigisi des Ertzcantzlers gezaicht