Gegeben am Fůnfftenn tag. Jůnÿ (. das ist an Sant Bonifacien
tag .) Im Jar der gebůrt vnsers herren Neůnhůndert vnnd Im
DreyvndSechtzigsten Jar. Vnsers Raichs Im
Sÿbenvnndzweintzigsten. Vnd vnsers kaÿserthůmbs Im andern Iar. In der
andern Romerzcal oder Jndicion. Gescheen zů Bern Oder Veron.

Kaÿser. Otto. der Erst hat das Closter Mimilewben angefangen
zubawen. da er aůch gestorben ist. Vnnd ist von seÿnem Sún
dem andern kaÿser. Otto. verbracht worden. Der ein mercklich
anzal můnchen dahin zů dem Apt geordent hat. Darnach
hat der hailig kaÿser. hainrich. dasselb Closter dem Stifft hirsfelt
In hessen vmb Moffondorff vnd dreÿ sitz Im landt zů Francken ligend geben.