Vnd entlich in ammacht fiel. Vnnd wiewol in totes noten sein
schwert dem obirstenn von den feinden mit diesenn wortenn gab
Nÿm ditz schwert vnd bring es deinem herren zů ainem zaichen.
den Sig zůbehalten. Vnd dem kaÿser zůvbersenden. Vnd mit diesen
Vnd andern worten. Wendet er sich gegen dem aůffgang der Sůnnen
vnd vberantwort mit heller stÿm dem almechtigenn got sein sell.
Ein solchs endt nam Graff Wigman Als aůch gar schier alle andere
die mit dem kaÿser. Otto. kriegtenn. Also behielt Misaca den Sig vnd
gewan gros gůt nach der schlacht. Vnd zcog mit seÿnem sighafftigenn
here frolich wider heÿm. Vnd gab seinem Vettern dem hertzogen.
Bolesla. von Behemen aůch tail von der Peůth. Aber die
Wappenn Vnnd das schwert Graůen Wigm ans. schicket er dem Romischen
kaÿser Vnd desselbenn Graůen Wigmans Erb vnnd gůter gab der Romisch
kaÿser darnach zweÿen Closternn erblich. den ain halbenn tail gein
Lůnenbůrg. Vnd den andern gein kemnaden vber dem wasser der weser gelegen.

Dieser Romischer kaÿser hat aůch in wenden zweÿ Bistůmb gestifft
Nemlich Stargarden. das von den vnsernn wirt Aldenbůrg gnant