Was kaÿser. Otto. in Teútzschen Landenn. Vnnd wiewol ÿm alle handelůng
vnúerborgenn. Dennoch wolt er die Romer von ÿrm grawsamen
vnzimlichen fůrnemen abzůlassenn. wider důrch botschafft
nach důrch schrifft warnen. Wann er was willens personlich
gen Rom zůzciehenn Derhalben er sich schleůnig růstet. Vnd
mit sambt seinem Sůn dem andern kaÿser. Otto. vnd seÿnem
here. gegen Rom vber das welsch gepÿrg. beÿ Trÿent zcog.

Als nůn der Romisch kaÿser zů Rom einziehenn wolt. zcog ÿm die gantz
Stat entgegen. Vnnd vor allen andern die gewaldige vnd Ambtlewt
als die sich schůldig wůstenn. aůffs serst [lies: erst] dem kaÿser schmeychelten
Dergleichen aůch der kaÿser gegen ÿn thet. Vnnd sich in keÿnem
ding lies vermercken als wissenhafftig ainiger ÿrer vnzimlickait
vnnd schalckait.