Darnach lies der Romisch kaÿser. Otto. die Ratsherrenn henckenn Aber
dieweil benanter pfleger zů Rom ein anheber was gewest aller schmeůng
vnd Jniůrien dem frůmmen Babst ertzaigt. So lies der kaÿser ÿn
spotlich důrch die gassenn fůhrn. vnnd mit geÿsseln důrch hawen darnach
in ein grawsam gefencknÿs legen. Vnnd entlich zů den Bůrgermaistern
in Germanien aůch in das Elendt schickenn. Platina meldt in seiner
Bebstlichen Cronicken das vil berůrter Peter pfleger zů Rom
seÿ der Bebstlichen hailickait geantwort worden zůstraffen. Vnd man
hab Im erstlich den bart abgenůmmen. Vnd mit den harnn an den
kopff des pferds Constancion gebůnden Vnd als er also eÿn weil
zů eyner forcht aller teter gestanden. hab man ÿn vom pferd
genummen. aůff eÿn Esel gesetzt. sein angesicht zů dem hindern.
mit eren zůschreiben des esels gekert. vnd sein hendt vnter des
esels schwantz zůsammen gebůnden. Vnd darnach hab man ÿn důrch die
gantze stat Rom gefůrt vnd mit gerten schier zům todt gestrichen
Vnd darnach in Tewtzsch Lanndt verweist.