Da kaÿser. Otto. alle Romischenn sachen het aůsgericht. vnd aůfs
best verfůget. beschlos er in seinem gemůt aůff anregůng des
Babsts Joannis vnd des Fůrstenn Pandůlffs vonn Capůa
obengedachts Fůrsten Iohanns Brúder der den Jofred vmbgebracht
hett. die Saracener aůs welschen Landen zůůertreiben. Demnach.
schicket er seinen Sůn konig. Otto. nach ÿm Romischer kaÿser
mit ainem heer gegenn Capůa. Von dannen gegen Calabrienn
zůraÿsen. die Saracener zuůertreibenn. wie aůch leichtlich
geschah Wann so bald růchtig wardt das die Teůtzschen mit
ainem heer kemen. teten sie ein grossen rawb in Jtalien.
Vnd schifftenn damit hinweg. Derhalben der Jůnger Otto
alle vesten vnd besetzůng von den Saracenern in landen Sicilie
aůffgericht vnd erbawet entwer mit seinem Folck besetzt. Ader
aber in grůnt verheret vnnd verderbet.