Graůen nit gebenn. Darůmb geliebt es dir. So zewg mit den feÿnden
hinweg. Dadůrch der Graf in scham. vnd rew. vnd dem Romischen
kaÿser zůfůssen fiel. Vnd ym gelobt diezeit seins lebens getrew zůbleÿben.

Dieser Romischer kayser. Otto. hat sein Erste eelich gemaheln die hailige
Konigin. Edith. von Engellandt gebornn beÿ seÿnes Vatern des
Romischen konigs Hainrichs. leben vberkůmmen. Vnnd
nachdem ÿm wie aůch obenberůrt ist zcwů schwesternn vonn
Engellandt bede von schon vnd Fůrstlichen Eren grosscheinbar
geschickt warn. Mit namen Fraw. Edith. vnd Fraw. Adina.
eÿne derselbenn nach seÿner wal zů seiner eelichen gemaheln.
zůbehaltenn. behielt er hochbenante selige Fraw. Edith.