Darnach zcog der kaÿser. Otto. mit vorberůrtem Babst Joannes
gen Raůenna vnnd hielten daselbst die hailigenn Osternn In
gegenwertickait gar schier aller Bischoůenn In Jtalien Aůch bracht
der Romisch kaÿser. Otto. dem haÿligenn Bebstlichenn Stůl die
Stat Raůenna mit yrenn zůgehorenden landen. vnd vil andere
Stete vor vil zeitenn vnd lang daůor der hailigen Romischenn
kirchenn entwant vnnd abgezcogenn wider heÿm. Vnnd
schicket darnach den Babst mit grosser fraÿd. wider gen Rom.