vnnd andererr Fůrsten vnnd Graůen beclaget er den vnvberwindlichenn
schaden des gantzen Raichs. Auch beweget yn die forcht seines
baldkůnfftigenn tods Derhalben weil er in vorzeitenn
Got gelobt ein Ertzbistůmb zu Magdebůrg aůffzůrichten. bevlis
er sich mit allem vermůgen sein gelůbd das er dem almechtigenn
gethan hett fůglich zůerfůllenn vnd aůszůrichtenn Darůmb
fordert er zů ym gen Rom Hildewart erwelten Bischoff zů halberstat.
Vnd gab ÿm zůerkennen sein fůrnemen. das er vil zceit
beÿ ÿm beschlossen. mit Gotlicher hilff ein Ertzbistůmb zů
Magdebůrg aůffzůrichtenn. Vmb hoffnůng willen der ewigen
belonůng. Vnd zu ainem gemeinem [lies: gemeinen] schůtz seiner Erblande. Diweÿl
nůn Magdebůrg in gedachten Bischoffs von halberstat Bistůmb lag gelobt
er ym nach allem seinem biten vnd ansÿnnen zů wilfarn. Wenn
er ym damit zůge fallen erschÿnn. Vnd in erfůllůng dieses
seinen gelůbs verwilligůng geb. Daraůff
dieser Bischoff vonn halberstat als eÿn weÿser herr. mit allem
willen darein verwilligt. Aůch ain tail seines Bistůmbs
zwischen den zweÿen wassern. der Elb vnnd Boda. aůff dem
Fridrichs weg gelegenn. dem almechtigenn Got. vnd seÿnem
hailigenn Ritter Sant Maůricien gab. Darnach gab er dem
Almechtigen vnd seinem hailigen merterer Sant Lorentz aůff
ansůchen des Romischenn kaÿsers die pfar vnnd gegent gelegen.
zwischen den wassern Willerbach. der Sal. Vnstrůt vnd helmana
vnnd walhůsen. Welchs dem Romischen kaÿser von
ÿm zů grossen gefallenn raicht. Derhalben er ÿn beÿ
seiner handt nam. Vnd ÿm die selsorg mit sambt dem stab gab.
Vnd nit vnbillich. Wann derselbig Bischoff hett Sant
Steffans Closter gar verfallenn von grůnt aůff widergebawet.
Auch hett er Sant Steffans blůt. mit sambt desselben zweÿen
gliddenn důrch begabůng Bischoůen Ditterichs vonn Metz.
daselbst hin gebracht. Aůch bawet er ain Jůnckfraw
Closter zú Stůterlinbůrg. Vnnd war allezeit mer bevlissen
der selenn hail. Dann des leibs nůtz vnnd lůst zůschaffenn
Vnnd starb eins hailigenn tods.

Aber der ErtzBischoffenn zü Magdebürg Cronicka hat also
die Historien vonn der Stifftůng des Ertzbistůmbs zů Magdebůrg
Dieser Romischer kaÿser hab ÿm fůrgenůmmen dem Lanndt zú
Sachssenn. welchs er vbermas liebt zů eren vnd hanthabůng
aůs Magdebůrg ein Ertzbistůmb zůmachenn Vnd die dreÿ benante
Bistůmb Mersbůrg. Brandenbůrg vnd Haůelberg von