Ÿm gestifft. Aůch die er noch willens war in zůkůnfft zůstifften
demselben Ertzbistúmb zú vnterwerffen. Vnnd daselbst alle
seine gůter. vnnd sich aůch selbst Sancto Maůricio zůgebenn.
Aber den tail so an der Stat Magdebůrg das Bistúmb zů halberstat
hett kůndt der kaÿser. Otto. herren Bernhardt dem Sÿbenden Bischoff
zů halberstadt nit erlangenn.

Als aber derselb Bischoff verstorbenn was. vnd an sein stadt
Herr hildewart erwelt wardt. zcog der Romisch kaÿser. Otto.
gein Rom. vnd bracht zůsammen ein Conciliům zů Raůenna in der
vorstat in Sant Seůers kirchenn. Das aůch der Babst Joannes
regirt. Derhalbenn der Romisch kaÿser. Otto. vor der
Bebstlichenn hailickait vnnd vil Bischoffenn Fůrsten vnd herren.
der Welschen. Tewtzschen. vnd Franckreichischen lande. vleÿssig
vnnd můntlich anzaigůng thet. mit was grosser arbeit. Vnnd
vilfaltiger ferlickaÿt er vil Wendischer Nacion zů dem haÿligen
Cristlichen glawbenn bekert hett. Vnd weÿl dieselben
nach new vnnd Jůng vnd deshalb nit gnůgsam bestetigt werden.
bat er sie alle vmb Rath. Wie. vnd mit was fůrnemen sie mochten.
Im hailigen glawben erhaltenn werden. Welch grosse Innickait
vnd loblich antragen das gantz Conciliům mit grosser wol maÿnůng
annam. Vnd eintrechtiglich beschloss das mann in eÿnem ÿedenn
Lanndt solt ein Bistůmb aůffrichtenn. vnd ein Bischoff setzenn.
Damit důrch sein Stet Predigen vnnd andern getrewen vleis
dieselben Lanndtschafft mochtenn in dem Cristlichen glawben bleÿben.

Aůff das aber solchs den Bischoffen dester thůelicher vnd můglicher
zúertragenn wůrdt. erkant das Conciliům das man solt ein Ertzbischoff
setzenn. dem die Bischoůen gehorsam wernn. Vnnd beÿ dem sie
vnnterweÿsůng vnd zůflůcht Inn ÿrem obligen sůchtenn.

Darůmb wart solch Ertzbistůmb gein Magdebůrg gelegt. vmb
der beqůemenn gelegenhait willenn. Aůch zům tail das der
Romisch kaÿser. Otto. dieselb Stat zůerhohen hoch genaÿgt was.

Weÿl aber der Bischoff vonn Halberstadt nit verhanden was.
lies das Conciliům den beschlies dieser sachenn bis aůff sein ankůnfft
berůen. Damit das derselb Bischoff genante Stat absolůirt
vnd ledigt der obirckait die er daran hett.

Welchs aůch entlich der Bischoff vonn Halberstat mit verwilligůng