des Ertzbischouen Hatto von Meintz. vnd des gantzen hailigenn
Concilÿ thett Vnd alle sein gerechtigkait die er an
Magdebůrg. vnnd dem Bistůmb zů Mersbůrg hett. Sancto Maůricio vbergab
in aller mas wie es das Bistůmb zů halberstat Innen gehabt
hett.

Da gegenn der Romisch kaÿser. Otto. gedachtem Bischoff
zů halberstat gab den zcehendt Im hosgowe zwischenn der Sala
Willerbeck. vnd Wippera Aůch die Apteÿ Sannt Wÿprechts
zů Herolůesfelt.

Also wart vil benante Apteÿ aůff Sant Johannis des hailigen
Tawffers Berg vor Magdebůrg gelegt. Vnnd damit die Samlůng
desselbenn Closters solch anderůng dester williger lÿd. begabt
sie der Romisch kaÿser mit vil grossenn gůttern vnnd priůilegien.

Dieser kaÿser verordent aůch das die Samlůng gedachts Closters
am tag der verlegůng. Welcher ist an Sant Lorentzen
abendt. Solt Jherlich mit einer Procession in die hochste
Thůmkirchenn zů Magdebůrg. Vnd ein lobliche mes. daselbst
halden. Damit In ewigem gedechtnÿs mocht bleÿbenn. Vnd
das die Tůmherrn. vnnd gedacht Samlůng stete aÿnickaÿt
mit eÿnnanderr hettenn.