Priester. Sÿbenn Diacon. vnd Viervnndzweintzig Sübdiacon
zůůerorden. teglich zů dem hohenn Altar zůdienen Aůch das
aůff Sannt Peters vnd Sannt Maůricÿ altar keÿn ander
dann Bischoff vnnd Ebte mes soltenn halten.

Aůch verordent merbenante Bebstliche hailickait diesenn zů
eÿnem Ertzbischoůen vber alle Wendische Lanndt die der Romisch
kaÿser. Otto. zům haÿligenn Cristlichenn glawbenn bekert hett.
ader nach bekert wúrdenn.

Aůch gab die Bebstliche hailickait ÿr gewalt vnd verwilligůng in
nachfolgenden Stetenn. da Inn vorzeitenn der vnglawb am grosten
gewest wer Bistůmb zůstifften vnnd aůffzůrichtenn. Als
Nemlich zů Czeitz. zů Meÿssenn. zů Merssbůrg. zů Brandenbůrg.
zů haůelberg. Vnd zú Posen In polnn. Vnd das dieselbenn Bischoff
solten alle dem Ertzbistůmb zů Magdebůrg vnterworffen seÿn.

Diese priůilegia wůrdenn alle důrch ein Decret des gantzenn
obengemeltenn Concilÿ bestetigt.

Aůch wardt ein Cardinall Benedictůs. vnnd ein Bischoff
Wittich genant. mit dem Ertzbischoff vonn Magdebůrg vonn
dem Concilio geschickt. diesen Erstenn Ertzbischoff
wirdiglichenn einzůweÿsenn.