Gieng er aüch zu der Vesper. Aber darnach bald sties ÿn
ein vber grosse hitz vnnd anmacht an. Da das die Fůrsten vnd
herren die vmb yn warn merckten. setzten sie ÿn aůff ein
stůl. vnd kůlten vnnd labten ÿn. Also begert er das hochwirdig
sacrament. Vnd entpfieng es mit solcher andacht das yedermann weÿnet.
vnd kůrtz darnach befalh er mit grosser senfftickait sein sel dem
almechtigenn Got am Sibenden tag Maÿ. Nach Cristi gebůrt Neůnhůndert
vnd Im dreÿv ndSibentzigsten Jar. Oder als etlich haben Im
ViervndSibentzigstenn seÿnes Romischen kaÿserthůmbs Im zwelfften. vnd ...
Im achtvnddreisigsten Iar. vnd Im Funfften Ihar der Stifftůng des
Ertzbistůmbs zů Magdebůrg. Darnach wart der Romisch
kaÿser also tot in die kammern getragen. vnd sein tot wart aůch dem
Folck verkůndet. Daůon ain gros laÿdt. weÿnen vnd betrůbnÿs erwůchs von
allen menschen. gar vil tag vber. vnd nit vnbillich. Wann nach
des Grossen vnd hailigen kaÿser karlls gezeiten war keÿn solcher
trefflicher kaÿser nÿe gewest. In folgender nacht wart dem
Romischen kayser sein Ingeweid ausgenůmmen. Vnd in vnser lieben
Frawenn kirchen zů Mÿmmelewben begraben.

Der ganntzleichnam dieses Romischen kaÿsers ist gebalsamirt worden.