Lothari. vnnd darnach Kaÿsers. Otto. eelich gemahel. hat etlich
grosse widerwertickait gehabt. Jst aůch gewest eÿnn
starckmůtige Fůrstÿn. vnnd so dapffer das sie sich hat dorffenn
weren gegendem grawsamen tÿrann Berengar dem Drittenn vor dem sich
ganntz Jtalien entsetzt.

Derhalbenn der vermeint konig. Berengar diese Romische konigÿn
aůch als etlich schreibenn. vmb yres Leipgedings willenn der Stadt
Paůÿ vnnd ÿrer zůgehorůng. fienng Vnnd zů Paůÿ. Oder als etlich
habenn. aůff dem Schlos Gardenn einsetzt. Vermeint sie důrch
solch gefencknÿs ÿrer gůter zůberawbenn.

Sabellicůs schreibt diese Romische kaÿserin seÿ so hart Im gefencknÿs
gehalten wordenn. das sie ein zeit nichts anders zů essenn Vnnd
trincken gehabt hab. Dann das sie hab důrch yrn aÿnigen diener
hab můssen erbetteln. Vnd sich also Ihemmerlich des bettels ernert.
die In koniglichem stant geborn. vnd kaÿserlicher hohe herkůmmen was.