den erwelten Romischen konig. also aůff den Romischen koniglichen
stůl setzten. wartet herr Hiltprecht Ertzbischoff zů
Meintz ein gar heiliger hochůerstendiger Fůrst. vnd etwan
ein Apt zů Fůlda. Sambt andern Bischoffen vnd der Priesterschafft.
vnd gaistlickaÿt des Romischen konigs vor vnser
lieben Frawen kirchen. alle In Bischofflicher zcirhaÿt vnd
Priesterlichen claÿdůng. Da nůn dieser Romischer
konig mit den weltlichen Fůrsten vnd herren kam. mit seÿner
procession. gieng ÿm benanter Ertzbischoff zů Meintz vnter
aůgen. Vnd nam des Romischen konigs rechte Handt mit
seiner lincken. vnd trat also. In seÿner Ertzbischofflichen
zcirůng. Sambt dem Erwelten Romischen konig mitten In
benante vnser liebenn Frawen kirchenn.

Da benanter Ertzbischoff von Meintz In seÿner Bischofflichenn
claÿdůng gezcirt also mitten In vnser lieben Frawen kirchenn
stůndt. Vnnd also das er. Nachdem vil geng in der selben kirchen
warn von yderman kůnt gesehenn werden. kert er sich zům Folck.