vnd redt diese meÿnůng. Nement wahr. ich fůr vor eůch
gegenwertigen Romischen konig. Otto. vor dem almechtigen Got erwelt
vnd der von seinem. Vater dem Romischen konig. hainrich. ist zů
Romischen konig geordent. Vnnd itzt von den Fůrsten des hailigenn
Romischen Raichs zů solcher Romischer koniglicher Maiestat erhohet.
Daraůff ich eůch alle in got verman. So eůch diese erwelůng gefellig.
wellent solch ewer maÿnůng. vnd gemůt mit aůffgehaben zů Got
henden anzcaigen. zůstůnd hůb alles Folck seyn hende In hÿmell
vnd wůntzschet mit grossem vnd laůtem geschreÿ. dem Newen
Romischen konig glůck vnd selickaÿtt.

Als mann nůn solt diesen Romischen kaÿser. Otto. zů Romischen konig
kronen. wůrden die dreÿ Ertzbischoff. von Meintz. von Coln. vnnd
vonn Trÿer Irrig vntereÿnander Vnnd ein yder vermeint
der wirdigst vnnd beqůemst zů solchen Eren seÿn. Derhalben
der Ertzbischoff zů Trÿer bracht fůr das gros alder seins Ertzbistůmbs